Zévènmen – Chinbo, Inc.

Kliké isit pou détay apré Immèrsyon kouri-vini: aprenn avek mitoloji

Chinbo, Inc. é mizé Capitol Park byin konten pou ofri in latéylé a sink jou tou en kouri-vini en jwin 2024. Immèrsyon kouri-vini: aprenn avèk mitoloji (Kouri-Vini Immersion: Learn with Mythologies) çé in latélyé gratwi apré lavi a moun, mit, lar, é rakonté Lalwizyàn avèk prézentasyon é latélyé en é apré kouri-vini. Programm immèrsyon kouri-vini-çila sa gidé par laktivis lingwistik, mèt, lartis profèsyonnèl, é ansyin American Idol contestant, Clif St. Laurent. Programm-la va fini avèk in latélyé pou ékri kont pendan tou lajounné, Kont pou piti-yé: ékri dan kouri-vini (Tales for Kids: Write in Kouri-Vini), gidé par ékrivènn, métrès, é fondatè Vilaj Bonjwa, Adrien Guillory-Chatman. “Çé importan pou aprenn vô langaj paren-yé,” di Gouvènè Letènnan Nungesser. “Ça isit—loportinnité immèrsyon inik pou aprenn en kouri-vini, langaj kréyol en danjé a nô léta—fourni léspas piblik nésésè pou kontinnwé pratiké lakiltir dan nô kominité-yé.”

Lalmanak

Lindi, le 3 Jwin-Jéddi, le 6 Jwin

9:30 m.a.–12:30 l.m. Immèrsyon kouri-vini gidé par Clif St. Laurent
12:30 m.a.–1:00 l.m. Dinê
1:00 m.a.–3:00 l.m. Latélyé avèk culture bearers

Vendrédi, le 7 Jwin

9:30 m.a.–12:30 l.m. Kont pou piti-yé avèk Adrien Guillory-Chatman
12:30 m.a.–1:30 l.m. Dinê ensenm
1:30 m.a.–3:00 l.m. Prézentasyon a moun ki patisipé

Immèrsyon langaj çé in mañè lédjikasyon dan ki dé in sijé çé montré dan dé langaj. Immèrsyon kouri-vini va komplimenté l’èkspo Mitoloji Latannyèr/Mythologies Louisianaises ki lá koté mizé Capitol Park, in mizé Léta Lalwizyàn, jiska désenm 2024.

Réjistré (FRÉMÉ ASTÈ)

Dat limit pou réjistré té le 21 avril 2024 a 10:00 m.a. lè Çentral. Pou réjistré pou latélyé Immèrsyon kouri-vini, komplété form Google trouvé enba. Latélyé-la ouvri a prinmyé 20 moun ki réjistré. Nou va ajouté twa dan waitlist si plas pou réjistré vini plin.

Latélyé Immèrsyon kouri-vini çé ouvri a moun k’apé aprenn ki gin laj 13+. Patisipan-yé ki gin laj 13–17 gin réjistré avèk in paren o gardyin *k’apé partisipé* (i.e. paren o gardyin-la va partisipé dan program immèrsyon-la). Paren-yé é gardyin-yé gin réjistré tou sèl. Tou partisipan gin vini fé parti latélyé shak jou. Paren-yé é gardyin-yé gin gaddé yê piti o jènn moun dan shak instan.

IMPORTAN: Si to réjistré pou Immèrsyon kouri-vini: aprenn avèk mitoloji (Kouri-Vini Immersion: Learn with Mythologies) gidé par Clif St. Laurent, to sa réjistré otomatik pou Kont pou piti-yé: ékri dan kouri-vini (Tales for Kids: Write in Kouri-Vini) gidé par Adrien Guillory-Chatman. To pa bezwin réjistré pou sô latéylé osit.

Programm-çila gin souchin ki sòr Louisiana Endowment for the Humanities-la (the state affiliate of the National Endowment for the Humanities). Nimpòt pèspèktiv o lopiñon pattajé dan projê Immèrsyon kouri-vini-la pa forsémen réprézenté çayé a Louisiana Endowment for the Humanities-la o National Endowment for the Humanities-la. Programm-çila gin souchin a Louisiana Folklore Society-la, National Endowment for the Arts-la, Louisiana Division of the Arts-la, é Louisiana Department of Culture, Recreation and Tourism-la osit.

Kliké isit pou détay apré Kont pou piti-yé: ékri dan kouri-vini

Chinbo, Inc. é mizé Capitol Park byin konten pou ofri in latéylé pou in sèl jou tou dan kouri-vini vendrédi, le 7 jwin 2024. Kont pou piti-yé: ékri dan kouri-vini (Tales for Kids: Write in Kouri-Vini) çé in latélyé gratwi pou in sèl jou k’olé montré piti é gran moun-yé apré litérati é rakonté dan kouri-vini. Adrien Guillory-Chatman, ènn ékrivènn, métrès, é fondatè a Vilaj Bonjwa, va gidé latélyé-çila. Jonathan J. Mayers, lartis vijwèl, é ansyin Poèt Loréya a Baton-Rouj, va asisté. Patisipan-yé va aprenn kont en tradisyon Lalwizyàn avèk karaktè zanimo, konm Bouki é Lapin. Lá, patisipa-yé va fé yéchènn kont pou piti-yé en kouri-vini ê sèrvi fasèt listwa mensyonné enho. Pou édé shak moun aprenn é ékri yê kont-yé, patisipan-layé va gin paròl é fraz-yé ki akòddé a yê konnésans. “Çé importan pou aprenn vô langaj paren-yé,” di Gouvènè Letènnan Nungesser. “Ça isit—loportinnité immèrsyon inik pou aprenn en kouri-vini, langaj kréyol en danjé a nô léta—fourni léspas piblik nésésè pou kontinnwé pratiké lakiltir dan nô kominité-yé.”

Lalmanak

Vendrédi, le 7 Jwin

9:30 m.a.–12:30 l.m. Kont pou piti-yé avèk Adrien Guillory-Chatman
12:30 m.a.–1:30 l.m. Dinê ensenm
1:30 m.a.–3:00 l.m. Prézentasyon a moun ki patisipé

Latélyé-çila va pasé pendan Immèrsyon kouri-vini: aprenn avèk mitoloji (Kouri-Vini Immersion: Learn with Mythologies) gidé par Clif St. Laurent. Ça va komplimenté l’èkspo Mitoloji Latannyèr/Mythologies Louisianaises ki lá koté mizé Capitol Park, in mizé Léta Lalwizyàn, jiska désenm 2024.

Réjistré (FRÉMÉ ASTÈ)

Dat limit pou réjistré té le 21 avril 2024 a 10:00 m.a. lè Çentral. Pou réjistré pou latélyé Kont pou piti-yé, komplété form Google trouvé enba. Latélyé-la ouvri a prinmyé 20 moun ki réjistré. Nou va ajouté twa dan waitlist si plas pou réjistré vini plin.

Latélyé Kont pou piti-yé çé ouvri a moun k’apé aprenn ki gin laj 10+. Çé enkourajé pou konné parlé langaj kouri-vini; y’a gin in tradiktè prézen. Moun ki réjistré gin fé parti tou latélyé. Patisipan-yé ki gin laj 10–17 gin èt akompañé avèk in paren o gardyin. Patisipan-yé sa shwazi dan lòd yé réjistré.

Zévènmen pasé

Chinbo fyè pou prézanté Gou é Gèt, nô prinmyé féstival pou Léritaj Moun Kréyòl Lalwizyàn: Ça sa in féstival en linñ de dé jou ki va rivé le 7^ièmépi 8^ièmDòktòb avèk sink zévènmen.

Pòrtré a Tambou (2023). Gras a Lucky Luke Films.

Sammdi 7 Dòktòb 2023

4:30sw – 6:00sw LÇ – De Ladjèl o Shaval: In parliyaj ak lê kréyatir Lotograf Kouri-Vini. Parlœr-yé: Christophe Landry, Clif St. Laurent, Michael Gisclair, é Eric Gaither. Fasilité par Jonathan Mayers, Préziden Chinbo, Inc. pi Cameron-Mitchell Ware, Produktè Krétayif koté The New Orleans African American Museum.

6:00sw – 6:10sw LÇ – Répozé

6:10sw – 6:20sw LÇ – Spéktak é sharé apré rol tambou-la jwé dan lavi a moun en koulè par Larènn Vodou Kalindah Laveaux

6:20sw – 6:40sw LÇ – Montré Tambou: Prinmyé pòtré en Kouri-Vini

6:40sw – 7:00sw LÇ – Q&A vèk memb lakas é bann. Fasilité par Cameron-Mitchell Ware, Produktè Kréyatif koté The New Orleans African American Museum.

Dimansh 8 Dòktòb 2023

4:30sw – 5:30sw LÇ – Strategies for the Lay Genealogist: Prézentasyon par
Jénéolojis Jari Honora vèk Q&A

5:30sw – 6:30sw LÇ – Tambou Enkò: In Konvèsasyon Lon apré Bat Tambou-la vèk Kalindah Laveaux

6:30sw – 7:30sw LÇ – Latab Kréyòl a Chinbo – Kont Ojòddi é Lézòt Fwa

Pou inskri, sitoplé komplé fòrm réjistrasyon-la ISIT.

* Rémarké, nora dê zen ent lê zévènmen ki sa rikòrdé pou særv pli tar.